സോഫ്റ്റ്‌വെയർ ഡെവലപ്‌മെന്റ് ഇൻസ്റ്റിറ്റ്യൂട്ടിന് പുതിയ കമാൻഡന്റ്

ബെംഗളൂരു: ഇന്ത്യൻ വ്യോമസേനയുടെ സോഫ്റ്റ്‌വെയർ ഡെവലപ്‌മെന്റ് ഇൻസ്റ്റിറ്റ്യൂട്ടിന്റെ (എസ്‌ഡിഐ) കമാൻഡന്റായി എയർ വൈസ് മാർഷൽ സരബ്‌ജിത് സിംഗ് വി.എസ്.എം ചുമതലയേറ്റു. 1992 ഒക്ടോബറിൽ ഇന്ത്യൻ വ്യോമസേനയുടെ എയറോണോട്ടിക്കൽ എഞ്ചിനീയറിംഗ് വിഭാഗത്തിലൂടെ സേവനത്തിൽ പ്രവേശിച്ച അദ്ദേഹം കമ്പ്യൂട്ടർ സയൻസ്, ഡിഫൻസ് സ്റ്റഡീസ്, മാനേജ്മെന്റ് വിഷയങ്ങളിൽ ബിരുദാനന്തര ബിരുദധാരിയാണ്. വെല്ലിംഗ്ടണിലെ ഡിഫൻസ് സർവീസസ് സ്റ്റാഫ് കോളേജിന്റെയും സെക്കന്തരാബാദിലെ കോളേജ് ഓഫ് എയർ വാർഫെയറിന്റെയും പൂർവവിദ്യാർത്ഥിയാണ്.
മൂന്ന് പതിറ്റാണ്ടിലേറെ നീണ്ട സേവനത്തിന് ശേഷം 2026 ഏപ്രിൽ 30ന് വിരമിച്ച എയർ വൈസ് മാർഷൽ രാമൻ ഗുരുഹരിയിൽ നിന്നാണ് സരബ്‌ജിത് സിംഗ് ചുമതലയേറ്റത്.

രാമൻ ഗുരുഹരിയുടെ നേതൃത്വത്തിൽ ഇന്ത്യൻ വ്യോമസേനയുടെ സ്വദേശിവത്കരണ പദ്ധതികൾക്കും നെറ്റ്‌വർക്ക് കേന്ദ്രീകൃത പ്രവർത്തനങ്ങൾക്കും വലിയ സംഭാവനകൾ നൽകിയതായി പ്രതിരോധ വകുപ്പ് അറിയിച്ചു. എ.ഡി.എ, ഐ.ഐ.ടി.എം, ഐ.ഐ.ഐ.ടി ബെംഗളൂരു എന്നിവയുമായി ധാരണാപത്രങ്ങൾ ഒപ്പുവെക്കുന്നതിൽ അദ്ദേഹം നിർണായക പങ്കുവഹിച്ചു. ഇതിലൂടെ വ്യോമസേന, അക്കാദമിക് മേഖല, വ്യവസായ മേഖല എന്നിവ തമ്മിലുള്ള സഹകരണം കൂടുതൽ ശക്തിപ്പെട്ടു.

പുതിയ നേതൃത്വത്തിൽ ആത്മനിർഭർ ഭാരത് ദർശനത്തിന് അനുസൃതമായി സ്വദേശിവത്കരണം, സാങ്കേതിക മുന്നേറ്റം, നെറ്റ്‌വർക്ക് കേന്ദ്രീകൃത ശേഷി, സോഫ്റ്റ്‌വെയർ അധിഷ്ഠിത സംവിധാനങ്ങൾ എന്നിവയ്ക്ക് കൂടുതൽ പ്രാധാന്യം നൽകുമെന്ന് ഇന്ത്യൻ വ്യോമസേന അറിയിച്ചു.