ന്യൂഡല്ഹി: ബിജെപിയുടെ മുന് കേന്ദ്രമന്ത്രി സ്വാമി ചിന്മയാനന്ദിനെതിരായ ലൈംഗികാരോപണത്തില് പുതിയ വഴിത്തിരിവ്. ചിന്മയാനന്ദിനെതിരേ ലൈംഗികാരോപണം ഉന്നയിച്ച 24കാരിയായ നിയമവിദ്യാര്ഥി മൊഴിമാറ്റി. ലക്നൗവിലെ പ്രത്യേക കോടതി ചൊവ്വാഴ്ച കേസ് പരിഗണിക്കവേയാണ് കോടതി മുമ്പാകെ പീഡനത്തിന് ഇരയായെന്ന മൊഴി പെണ്കുട്ടി നിഷേധിച്ചത്.
സമ്മര്ദ്ദത്തിലാണ് ചിന്മയാനന്ദിനെതിരേ ലൈംഗീകാരോപണം ഉന്നയിച്ച് പരാതി നല്കിയതെന്നാണ് പെണ്കുട്ടിയുടെ പുതിയ വെളിപ്പെടുത്തല്. അഡീഷ്ണല് ജില്ലാ ജഡ്ജ് പവന് കുമാര് റായ്ക്ക് മുമ്പാകെയാണ് മുമ്പ് പറഞ്ഞതെല്ലാം നിരാകരിച്ച് പെണ്കുട്ടി പുതിയ മൊഴി നല്കിയത്.
കഴിഞ്ഞ വര്ഷമാണ് സ്വാമി ചിന്മയാനന്ദ തന്നെ ഒരു വര്ഷത്തോളം പീഡിപ്പിച്ചതായി ആരോപിച്ച് പെണ്കുട്ടി പരാതി നല്കിയത്. ചിന്മയാനന്ദ് ട്രസ്റ്റിന് കീഴില് ഷാജഹാന്പുരിലുള്ള ലോ കോളേജിലെ വിദ്യാര്ഥിയായിരുന്നു പെണ്കുട്ടി. ഇതിന്റെ അടിസ്ഥാനത്തില് 2019 സെപ്റ്റംബറില് ചിന്മയാനന്ദിനെ പോലീസ് അറസ്റ്റ് ചെയ്തു.
അതേസമയം മൊഴിമാറ്റിയതിന് നിയമവിദ്യാര്ഥി കൂടിയായ പെണ്കുട്ടിക്കെതിരേ കേസെടുക്കാന് പ്രോസിക്യൂഷന് അനുമതി തേടി. കേസില് ഒക്ടോബര് 15ന് കോടതി വീണ്ടും വാദം കേള്ക്കും.
