MSME നിയമഭേദഗതിക്ക് കേന്ദ്ര മന്ത്രിസഭയുടെ അംഗീകാരം; കുടിശ്ശിക തീർപ്പാക്കൽ വേഗത്തിലാക്കാനും ബിസിനസ് സൗഹൃദ അന്തരീക്ഷം ശക്തിപ്പെടുത്താനും നടപടി

ന്യൂഡൽഹി: സൂക്ഷ്മ, ചെറുകിട, ഇടത്തരം സംരംഭങ്ങളുടെ വളർച്ചയ്ക്ക് കൂടുതൽ പിന്തുണ നൽകുന്ന തരത്തിൽ എം.എസ്.എം.ഇ. വികസന നിയമത്തിൽ ഭേദഗതി വരുത്താൻ കേന്ദ്ര മന്ത്രിസഭ അംഗീകാരം നൽകി. കുടിശ്ശിക പണമടവ് വേഗത്തിലാക്കൽ, തർക്കപരിഹാര സംവിധാനം ശക്തിപ്പെടുത്തൽ, ബിസിനസ് ചെയ്യുന്നതിനുള്ള സൗകര്യം മെച്ചപ്പെടുത്തൽ എന്നിവ ലക്ഷ്യമിട്ടാണ് ഭേദഗതികൾ.

സർക്കാർ പൊതുമേഖലാ സ്ഥാപനങ്ങൾ അവരുടെ പൊതുമേഖലാ സംരംഭങ്ങളെ (PSEs) ട്രേഡ്സ് (TReDS) പ്ലാറ്റ്‌ഫോം വഴി ഇൻവോയ്സ് തീർപ്പാക്കൽ പ്രോത്സാഹിപ്പിക്കണമെന്നും നിർദേശിച്ചിട്ടുണ്ട്. എം.എസ്.എം.ഇ.കൾക്ക് അധിക പ്രവർത്തന മൂലധനം ലഭ്യമാക്കുകയും സമയബന്ധിതമായി പണമടവ് ഉറപ്പാക്കുകയും ചെയ്യുന്ന സ്ഥാപനപരമായ സംവിധാനമായി TReDS മാറിയതായി സർക്കാർ ചൂണ്ടിക്കാട്ടി. 2022-23ൽ 40,000 കോടി രൂപയായിരുന്നു TReDS വഴിയുള്ള ഇൻവോയ്സ് ഡിസ്കൗണ്ടിംഗ്; 2025-26ൽ ഇത് 3.47 ലക്ഷം കോടി രൂപയായി ഉയർന്നിട്ടുണ്ട്.

CPSEകളുടെ ഇൻവോയ്സ് തീർപ്പാക്കൽ നിർബന്ധമായും TReDS വഴി നടത്തുന്നതോടെ എം.എസ്.എം.ഇ.കളുടെ കുടിശ്ശിക പ്രശ്നങ്ങൾ കൂടുതൽ കുറയുമെന്നാണ് വിലയിരുത്തൽ.
സംസ്ഥാനങ്ങൾക്ക് കൂടുതൽ മൈക്രോ ആൻഡ് സ്മോൾ എന്റർപ്രൈസസ് ഫെസിലിറ്റേഷൻ കൗൺസിലുകൾ (MSEFC) രൂപീകരിക്കാൻ സൗകര്യമൊരുക്കുന്ന തരത്തിലാണ് മറ്റൊരു പ്രധാന ഭേദഗതി. കൗൺസിലുകളുടെ ഘടന യുക്തിസഹമാക്കിയതോടെ സംസ്ഥാനങ്ങൾക്ക് ആവശ്യാനുസരണം ഒന്നിലധികം MSEFCകൾ രൂപീകരിക്കാനും എം.എസ്.എം.ഇ.കളുടെ കുടിശ്ശിക സംബന്ധിച്ച തർക്കങ്ങൾ വേഗത്തിൽ പരിഹരിക്കാനും കഴിയും.

MSEFCകളുടെ പ്രവർത്തനത്തിനുള്ള ചട്ടങ്ങൾ രൂപപ്പെടുത്താനുള്ള അധികാരവും സംസ്ഥാന സർക്കാരുകൾക്ക് നൽകും.
Ease of Doing Business ശക്തിപ്പെടുത്തുന്നതിനായി എം.എസ്.എം.ഇ. നിയമത്തിലെ ചില ശിക്ഷാ വ്യവസ്ഥകളും ഭേദഗതി ചെയ്തു.

രജിസ്ട്രേഷൻ നടത്താത്തതിനും ആവശ്യമായ വിവരങ്ങൾ നൽകാത്തതിനുമുള്ള ക്രിമിനൽ നടപടികൾ ഒഴിവാക്കി, ഘട്ടംഘട്ടമായ സിവിൽ പിഴ സംവിധാനമാണ് കൊണ്ടുവന്നത്. തെറ്റായ വിവരങ്ങൾ ആദ്യമായി നൽകിയാൽ മുന്നറിയിപ്പ് നൽകും; പിന്നീട് ആവർത്തിച്ചാൽ പിഴ ഈടാക്കും. വാർഷിക കണക്കുകളിൽ എം.എസ്.എം.ഇ.കൾക്ക് നൽകാനുള്ള കുടിശ്ശികയും പലിശയും വെളിപ്പെടുത്താത്ത വാങ്ങുന്നവർക്കും ആദ്യ ഘട്ടത്തിൽ മുന്നറിയിപ്പും തുടർന്ന് പിഴയും പിന്നീട് കൂടുതൽ കർശന നടപടികളും സ്വീകരിക്കും.

ഈ ഭേദഗതികൾ ‘വികസിത് ഭാരത് @2047’ എന്ന കേന്ദ്ര സർക്കാരിന്റെ ലക്ഷ്യവുമായി യോജിച്ചുള്ളതാണെന്ന് സർക്കാർ വ്യക്തമാക്കി. എം.എസ്.എം.ഇ. മേഖലയെ കൂടുതൽ ഔപചാരികമാക്കുന്നതിനും സംരംഭങ്ങൾ വികസിപ്പിച്ച് വളർച്ചയുടെ പ്രധാന ശക്തിയാക്കി മാറ്റുന്നതിനും നിയമഭേദഗതി സഹായകരമാകുമെന്ന് സർക്കാർ പ്രതീക്ഷ പ്രകടിപ്പിച്ചു. കൂടാതെ, ബിസിനസ് സൗഹൃദ അന്തരീക്ഷം ശക്തിപ്പെടുത്തുകയും നിയമാനുസൃത പ്രവർത്തനങ്ങൾ പ്രോത്സാഹിപ്പിക്കുകയും ചെയ്യുമെന്നും കേന്ദ്ര സർക്കാർ അറിയിച്ചു.