സ്വൈര്യജീവിതം ഉറപ്പാക്കുന്നതിൽ കേരള പോലീസിന്റെ പങ്ക് നിസ്തുലം: മന്ത്രി രമേശ് ചെന്നിത്തല

കെ.എ.പി. ഒന്നാം, രണ്ടാം, ഇന്ത്യ റിസർവ് ബറ്റാലിയൻ പാസിംഗ് ഔട്ട് പരേഡ്

കുറ്റാന്വേഷണത്തിലും ജനങ്ങളുടെ ജീവനും സ്വത്തിനും സുരക്ഷ ഉറപ്പാക്കുന്നതിലും കേരള പോലീസിന്റെ പങ്ക് നിസ്തുലവും പ്രശംസനീയവുമാണെന്ന് ആഭ്യന്തര വകുപ്പ് മന്ത്രി രമേശ് ചെന്നിത്തല പറഞ്ഞു. ഭരണഘടനാ മൂല്യങ്ങൾ ഉയർത്തിപ്പിടിച്ച് ജനങ്ങൾക്ക് സ്വൈര്യജീവിതം ഉറപ്പാക്കാൻ പുതിയ പോലീസ് ഉദ്യോഗസ്ഥർ പ്രതിജ്ഞാബദ്ധരാകണമെന്നും അദ്ദേഹം ആഹ്വാനം ചെയ്തു.

മുട്ടിക്കുളങ്ങര കെ.എ.പി. രണ്ടാം ബറ്റാലിയൻ പരേഡ് ഗ്രൗണ്ടിൽ നടന്ന കെ.എ.പി. ഒന്നാം, രണ്ടാം, ഇന്ത്യ റിസർവ് ബറ്റാലിയൻ റിക്രൂട്ട് പോലീസ് ഡ്രൈവർ സേനാംഗങ്ങളുടെ പാസിംഗ് ഔട്ട് പരേഡിൽ അഭിവാദ്യം സ്വീകരിച്ച് സംസാരിക്കുകയായിരുന്നു മന്ത്രി.

പരിശീലനത്തിൽ മികച്ച പ്രകടനം കാഴ്ചവെച്ച റിക്രൂട്ടുകൾക്ക് അദ്ദേഹം പുരസ്കാരങ്ങളും വിതരണം ചെയ്തു.വിദ്യാസമ്പന്നരായ യുവാക്കൾ പോലീസ് സേനയിലേക്ക് എത്തുന്നത് കേരള പോലീസിന്റെ പ്രവർത്തനക്ഷമതയും മികവും കൂടുതൽ ഉയർത്തുമെന്ന് മന്ത്രി പറഞ്ഞു. ഓരോ പോലീസ് ഉദ്യോഗസ്ഥനും സമൂഹത്തിന് മാതൃകയാകുന്ന രീതിയിൽ സേവനം അനുഷ്ഠിക്കണമെന്നും അദ്ദേഹം ഓർമ്മിപ്പിച്ചു.

കേരള ആംഡ് പോലീസ് ഒന്നാം ബറ്റാലിയനിൽ നിന്നുള്ള 127 പേരും രണ്ടാം ബറ്റാലിയനിൽ നിന്നുള്ള 110 പേരും ഇന്ത്യ റിസർവ് ബറ്റാലിയനിൽ പരിശീലനം നേടിയ 110 റിക്രൂട്ട് പോലീസ് ഡ്രൈവർ സേനാംഗങ്ങളും ഉൾപ്പെടെ ആകെ 347 റിക്രൂട്ടുകൾ പാസിംഗ് ഔട്ട് പരേഡിൽ പങ്കെടുത്തു. വിനീത് പി. പരേഡിനെ നയിച്ചപ്പോൾ ഹാഷിം അലിയാർ സെക്കൻഡ് ഇൻ കമാൻഡറായിരുന്നു.
മികച്ച പ്രകടനം കാഴ്ചവെച്ച റിക്രൂട്ടുകൾക്ക് വിവിധ വിഭാഗങ്ങളിലായി പുരസ്കാരങ്ങൾ നൽകി. കെ.എ.പി. ഒന്നാം ബറ്റാലിയനിൽ അജിത്ത് കെ.ആർ. മികച്ച ഇൻഡോർ കേഡറ്റായും ഷിനു റോബിൻ ആർ.ജെ. മികച്ച ഔട്ട്ഡോർ കേഡറ്റായും ഓൾറൗണ്ടറായും തെരഞ്ഞെടുക്കപ്പെട്ടു. വിഷ്ണു പി.എസ്. മികച്ച ഷൂട്ടറിനുള്ള അംഗീകാരം നേടി.

കെ.എ.പി. രണ്ടാം ബറ്റാലിയനിൽ ശ്രീഹരി എൻ. ആനന്ദ് മികച്ച ഇൻഡോർ കേഡറ്റായും വിനീത് പി. മികച്ച ഔട്ട്ഡോർ കേഡറ്റായും സജിത്ത് സി.ബി. മികച്ച ഷൂട്ടറായും ഹർഷദ് വി. മികച്ച ഓൾറൗണ്ടറായും തെരഞ്ഞെടുക്കപ്പെട്ടു.ഇന്ത്യ റിസർവ് ബറ്റാലിയനിൽ രാഹുൽ ആർ.എസ്. മികച്ച ഇൻഡോർ കേഡറ്റായും അർജുൻ കെ.എ. മികച്ച ഔട്ട്ഡോർ കേഡറ്റായും ബിജിൻ രാജ് വി.എസ്. മികച്ച ഷൂട്ടറായും ഉബൈത് എം. മികച്ച ഓൾറൗണ്ടറായും തെരഞ്ഞെടുക്കപ്പെട്ടു.

അടിസ്ഥാന പരിശീലനത്തിന്റെ ഭാഗമായി ശാരീരികക്ഷമത, ആയുധപരിശീലനം, കരാട്ടെ, യോഗ, നീന്തൽ, വിവിധ സെൽഫ് ഡിഫൻസ് പരിശീലനങ്ങൾ, ഫയറിംഗ് എന്നിവയ്ക്കൊപ്പം ഇന്ത്യൻ ഭരണഘടന, ഭാരതീയ ന്യായ സംഹിത, മോട്ടോർ വാഹന നിയമം, ടെലികമ്മ്യൂണിക്കേഷൻ, സോഷ്യൽ മീഡിയ, സൈബർ കുറ്റകൃത്യങ്ങൾ, വ്യക്തിത്വ വികസനം തുടങ്ങിയ വിഷയങ്ങളിലും റിക്രൂട്ടുകൾക്ക് പരിശീലനം നൽകി.

ഫോറൻസിക് സയൻസ്, ഫോറൻസിക് മെഡിസിൻ, സൈബർ ഫോറൻസിക്, പീനോളജി, വിക്ടിമോളജി തുടങ്ങിയ വിഷയങ്ങളിലും പരിശീലനം നൽകിയതായി അധികൃതർ അറിയിച്ചു. സ്ത്രീകൾ, കുട്ടികൾ, മുതിർന്ന പൗരന്മാർ, ജെൻഡർ ന്യൂട്രൽ വിഭാഗങ്ങൾ എന്നിവരോടുള്ള മാനുഷിക സമീപനവും പരിസ്ഥിതിക്കെതിരായ കുറ്റകൃത്യങ്ങൾ തടയുന്നതുമായി ബന്ധപ്പെട്ട വിഷയങ്ങളും പരിശീലനത്തിന്റെ ഭാഗമായിരുന്നു.

ചടങ്ങിൽ എം.എൽ.എമാരായ എ. പ്രഭാകരൻ, രമേശ് പിഷാരടി, സംസ്ഥാന പോലീസ് മേധാവി റവാഡ ആസാദ് ചന്ദ്രശേഖർ, എ.ഡി.ജി.പി. ബൽറാം കുമാർ ഉപാധ്യായ, കേരള പോലീസ് അക്കാദമി ഡയറക്ടർ കെ. സേതുരാമൻ, തൃശൂർ റേഞ്ച് ഡി.ഐ.ജി. നാരായണൻ ടി., ഡി.ഐ.ജി. ജെ. ഹിമേന്ദ്രനാഥ്, കമാൻഡന്റ് കെ.ഇ. ബൈജു, ജില്ലാ പോലീസ് മേധാവി എ. അബ്ദുൾ റാഷിദ്, കമാൻഡന്റുമാരായ പി. വാഹിദ്, ജാക്സൺ പീറ്റർ, രാജേഷ് ആർ., പ്രേമൻ യു. എന്നിവർ ഉൾപ്പെടെ ഉന്നത പോലീസ് ഉദ്യോഗസ്ഥരും റിക്രൂട്ടുകളുടെ ബന്ധുക്കളും പങ്കെടുത്തു.